ഒരു യഥാർത്ഥ പ്രവാചകനെ എങ്ങനെ തിരിച്ചറിയാം?
ബൈബിൾ പ്രവചനത്തെ വിലമതിക്കുമ്പോഴും അതോടൊപ്പം വിവേചനവും ആവശ്യപ്പെടുന്നു:
“ഏതു ആത്മാവിനെയും വിശ്വസിക്കാതെ ആത്മാക്കൾ ദൈവത്തിൽ നിന്നുള്ളവയോ എന്നു പരീക്ഷിപ്പിൻ.”
(1 യോഹന്നാൻ 4:1)
പ്രവചനം കേൾക്കുമ്പോൾ അത് ശക്തമായി തോന്നുന്നു എന്നതുകൊണ്ടോ, നമ്മുടെ ആഗ്രഹങ്ങളോട് യോജിക്കുന്നു എന്നതുകൊണ്ടോ ഉടൻ സ്വീകരിക്കരുത്. പ്രവാചകനെയും പ്രവചനത്തെയും ഒരുപോലെ ദൈവവചനത്തിന്റെ വെളിച്ചത്തിൽ പരിശോധിക്കണം.
1. പരിശുദ്ധാത്മാവിന്റെ ഫലം ഉണ്ടോ?
“അവരുടെ ഫലങ്ങളാൽ നിങ്ങൾ അവരെ തിരിച്ചറിയും.”
(മത്തായി 7:16)
ക്രിസ്തുവിന്റെ സ്നേഹം, വിശുദ്ധി, ആത്മനിയന്ത്രണം, താഴ്മ, വിശ്വസ്തത, ദയ എന്നിവ അവന്റെ ജീവിതത്തിൽ കാണുന്നുണ്ടോ?
(ഗലാത്യർ 5:22-23)
ഒരു വ്യക്തിക്ക് ആത്മീയവരം ഉണ്ടായിരിക്കാം. എന്നാൽ ആത്മീയവരം മാത്രം ക്രിസ്തുസാദൃശ്യമുള്ള സ്വഭാവത്തിന്റെ തെളിവല്ല. വരത്തേക്കാൾ ജീവിതത്തിന്റെ ഫലം ശ്രദ്ധിക്കണം.
2. പറയുന്ന സുവിശേഷം ക്രിസ്തുവിന്റെ ക്രൂശിന്റെ വചനത്തെ കേന്ദ്രമാക്കുന്നുണ്ടോ?
“യേശുക്രിസ്തുവും അവൻ ക്രൂശിക്കപ്പെട്ടതും അല്ലാതെ മറ്റൊന്നും അറിയാതിരിപ്പാൻ ഞാൻ തീരുമാനിച്ചു.”
(1 കൊരിന്ത്യർ 2:2)
ക്രിസ്തുവിന്റെ ക്രൂശിന്റെ വചനം, രക്ഷ, മാനസാന്തരം, വിശ്വാസം, കൃപ, വിശുദ്ധീകരണം എന്നിവയ്ക്കു പകരം സമ്പത്ത്, വിജയം, സ്ഥാനമാനം, ഭൗതിക അനുഗ്രഹം, ഭാവിയെക്കുറിച്ചുള്ള കാര്യങ്ങൾ എന്നിവ മാത്രം കേന്ദ്രമാകുന്നുവെങ്കിൽ ജാഗ്രത വേണം.
“വ്യത്യസ്തമായ ഒരു സുവിശേഷം ആരെങ്കിലും പ്രസംഗിച്ചാൽ അവൻ ശപിക്കപ്പെട്ടവൻ.”
(ഗലാത്യർ 1:8)
അതുകൊണ്ട് പ്രവചനത്തെക്കാൾ ആദ്യം പ്രവാചകൻ പ്രസംഗിക്കുന്ന സുവിശേഷം പരിശോധിക്കണം.
3. പ്രവാചകനു വിശുദ്ധ ജീവിതമുണ്ടോ?
അഹങ്കാരം, പണലോഭം, ലോകമോഹം, അധികാരമോഹം, ലൈംഗിക അശുദ്ധി, സ്വാർത്ഥത എന്നിവ സ്ഥിരമായി അവന്റെ ജീവിതത്തെ ഭരിക്കുന്നുണ്ടോ?
ഇവിടെ ഉദ്ദേശിക്കുന്നത് ഒരു ദൈവദാസൻ ഒരിക്കലും വീഴില്ല എന്നല്ല. വീഴ്ച സംഭവിക്കുമ്പോൾ മാനസാന്തരവും തിരുത്തലും വിശുദ്ധിയിലേക്കുള്ള വളർച്ചയും ഉണ്ടോ എന്നതാണ് പ്രധാനപ്പെട്ടത്.
4. പ്രവചനങ്ങൾ നിവൃത്തിയാകുന്നുണ്ടോ?
“ആ കാര്യം സംഭവിക്കാതെയും നിവൃത്തിയാകാതെയും ഇരുന്നാൽ, അത് യഹോവ അരുളിച്ചെയ്തതല്ല.”
(ആവർത്തനപുസ്തകം 18:22)
“ദൈവം പറഞ്ഞു”, “തീർച്ചയായും സംഭവിക്കും” എന്ന ഉറപ്പോടെ പറഞ്ഞ പ്രവചനങ്ങൾ പ്രത്യേകമായി പരിശോധിക്കണം.
ഒരു പ്രവചനം നിവൃത്തിയായെന്നത് മാത്രം പ്രവാചകൻ ദൈവത്തിൽ നിന്നുള്ളവനാണെന്ന് തെളിയിക്കുന്നില്ല. മറ്റു പരിശോധനകളും ആവശ്യമാണ്.
5. പ്രവചനം ദൈവവചനത്തോട് യോജിക്കുന്നുണ്ടോ?
“നിയമത്തിനും സാക്ഷ്യത്തിനും ചേർച്ചയായി ചോദിച്ചറിയുവിൻ.”
(യെശയ്യാവ് 8:20)
ബൈബിളിന്റെ വ്യക്തമായ പഠിപ്പിക്കലിന് വിരുദ്ധമായ പ്രവചനം സ്വീകരിക്കരുത്. പരിശുദ്ധാത്മാവ് തിരുവചനത്തിന് വിരുദ്ധമായി നയിക്കുകയില്ല.
ചോദിക്കേണ്ടത്:
“ഇത് എനിക്ക് ഇഷ്ടമാണോ?”
എന്നല്ല.
“ഇത് ദൈവവചനത്തോട് യോജിക്കുന്നുണ്ടോ?”
എന്നാണ്.
6. ക്രിസ്തുവിലേക്കും വിശുദ്ധിയിലേക്കും നയിക്കുന്നുണ്ടോ?
“പ്രവചിക്കുന്നവൻ ആത്മികവർദ്ധനയും പ്രബോധനവും ആശ്വാസവും സംസാരിക്കുന്നു.”
(1 കൊരിന്ത്യർ 14:3)
പ്രവചനം മാനസാന്തരം, വിശ്വാസം, വിശുദ്ധീകരണം, അനുസരണം എന്നിവ വളർത്തുന്നുണ്ടോ? അതോ അഹങ്കാരവും സ്വാർത്ഥതയും ലോകമോഹവും മനുഷ്യാശ്രയവും വളർത്തുന്നുണ്ടോ?
ദൈവത്തിൽ നിന്നുള്ള പ്രവചനം നമ്മെ ദൈവഹിതം തിരിച്ചറിയുന്നതിനും അതനുസരിച്ച് നടക്കുന്നതിനും സഹായിക്കണം.
7. ക്രിസ്തുവിനെ മഹത്വപ്പെടുത്തുന്നുണ്ടോ?
“അവൻ എന്നെ മഹത്വപ്പെടുത്തും.”
(യോഹന്നാൻ 16:14)
ശുശ്രൂഷയുടെ കേന്ദ്രം ക്രിസ്തുവാണോ, പ്രവാചകൻ തന്നെയാണോ?
“എന്റെ പ്രവചനങ്ങൾ”, “എന്റെ അഭിഷേകം”, “എന്റെ ശുശ്രൂഷ” എന്നിങ്ങനെ സ്വയം ഉയർത്തുന്നതാണ് കേന്ദ്രമെങ്കിൽ ജാഗ്രത വേണം.
യഥാർത്ഥ ശുശ്രൂഷ മനുഷ്യനെ ഉയർത്തുകയല്ല, ക്രിസ്തുവിനെ മഹത്വപ്പെടുത്തുകയാണ് ചെയ്യുന്നത്.
8. പരിശോധനയ്ക്ക് തയ്യാറാണോ?
“രണ്ടോ മൂന്നോ പ്രവാചകന്മാർ സംസാരിക്കട്ടെ; മറ്റുള്ളവർ വിധിക്കട്ടെ.”
(1 കൊരിന്ത്യർ 14:29)
ചോദ്യം ചെയ്യലും വചനപരിശോധനയും നിരസിക്കുന്ന പ്രവാചകനെക്കുറിച്ച് ജാഗ്രത വേണം.
ദൈവത്തിൽ നിന്നുള്ള പ്രവചനത്തിന് ദൈവവചനത്തിന്റെ പരിശോധനയെ ഭയപ്പെടേണ്ടതില്ല.
9. പ്രവചനത്തിന്റെ ഫലം എന്താണ്?
പ്രവചനത്തിനു ശേഷം കേൾക്കുന്ന എന്നിൽ ക്രിസ്തുവിനോടുള്ള സ്നേഹം, വിശ്വാസം, വിശുദ്ധി, അനുസരണം, ദൈവത്തിലുള്ള ആശ്രയം, ദൈവീക സമാധാനം എന്നിവ വർധിക്കുന്നുണ്ടോ?
അല്ലെങ്കിൽ ഭയം, ആശയക്കുഴപ്പം, മനുഷ്യാശ്രയം, പ്രവാചകനെ ഉയർത്തൽ, സാമ്പത്തിക ചൂഷണം, സ്വാർത്ഥത എന്നിവ വളരുന്നുണ്ടോ?
“എല്ലാം ശോധനചെയ്തു നല്ലതു മുറുകെപ്പിടിപ്പിൻ.”
(1 തെസ്സലൊനീക്യർ 5:21)
10. പ്രവാചകനെയും പ്രവചനത്തെയും വേർതിരിച്ച് പരിശോധിക്കുക
ഒരു നല്ല ജീവിതം അവന്റെ എല്ലാ പ്രവചനങ്ങളും ദൈവത്തിൽ നിന്നുള്ളതാണെന്ന് തെളിയിക്കുന്നില്ല.
അതുപോലെ, ഒരു ശരിയായ പ്രവചനം മാത്രം അവൻ യഥാർത്ഥ പ്രവാചകനാണെന്നും തെളിയിക്കുന്നില്ല.
“കള്ളക്രിസ്തുക്കളും കള്ളപ്രവാചകന്മാരും എഴുന്നേറ്റ് കഴിയുമെങ്കിൽ തിരഞ്ഞെടുക്കപ്പെട്ടവരെയും തെറ്റിപ്പാൻ വലിയ അടയാളങ്ങളും അത്ഭുതങ്ങളും കാണിക്കും.”
(മത്തായി 24:24)
അതുകൊണ്ട് രണ്ടു ചോദ്യങ്ങൾ ചോദിക്കണം:
പ്രവാചകൻ ആരാണ്?
പ്രവചനം എന്താണ്?
രണ്ടും ക്രിസ്തുവിന്റെയും തിരുവചനത്തിന്റെയും വെളിച്ചത്തിൽ പരിശോധിക്കണം.
11. ക്രിസ്തു അവനെ ഭരിക്കുന്നുണ്ടോ?
അവന്റെ ചിന്തകളും ആഗ്രഹങ്ങളും തീരുമാനങ്ങളും ക്രിസ്തുവിന്റെ കീഴിലാണോ?
അതോ അഹങ്കാരം, ലോകമോഹം, പണലോഭം, അധികാരമോഹം, പ്രശസ്തിയാഗ്രഹം, സ്വാർത്ഥത എന്നിവയാണോ അവനെ ഭരിക്കുന്നത്?
ക്രിസ്തു ഭരിക്കുന്ന ഒരു ദൈവദാസൻ തന്റെ ശുശ്രൂഷയെയും പ്രവചനത്തെയും സ്വന്തം മഹത്വത്തിനായി ഉപയോഗിക്കുകയില്ല.
എന്നിരുന്നാലും, അവൻ ക്രിസ്തുവിനെ അനുഗമിക്കുന്നവനാണെങ്കിലും, അവന്റെ പ്രവചനങ്ങൾ തിരുവചനത്തിന് വിധേയമായി പരിശോധിക്കേണ്ടതുണ്ട്.
12. വ്യക്തിപരമായ വിവേചനം നഷ്ടപ്പെടുത്തരുത്
പ്രവചനം കേട്ട ഉടൻ വലിയ തീരുമാനമെടുക്കരുത്.
ദൈവത്തോട് പ്രാർത്ഥിക്കുക.
ദൈവവചനത്തിൽ പരിശോധിക്കുക.
സാഹചര്യങ്ങൾ വിലയിരുത്തുക.
പക്വരായ വിശ്വാസികളുടെ ഉപദേശം തേടുക.
“ആലോചനക്കാരുടെ ബഹുത്വത്തിൽ സുരക്ഷ ഉണ്ടു.”
(സദൃശവാക്യങ്ങൾ 11:14)
വിവാഹം, ജോലി, സാമ്പത്തികം, രാജ്യം മാറൽ, ശുശ്രൂഷ തുടങ്ങിയ നിർണായക കാര്യങ്ങളിൽ ഒരാളുടെ പ്രവചനത്തെ മാത്രം ആശ്രയിക്കരുത്.
പ്രവചനം കേൾക്കാം; എന്നാൽ തീരുമാനത്തിന്റെ കർത്താവ് ക്രിസ്തുവായിരിക്കണം.
13. മനസ്സിന്റെ പുതുക്കത്തിലൂടെ ദൈവഹിതം തിരിച്ചറിയുന്നുണ്ടോ?
റോമർ 12:1-2 പ്രവചനത്തെ വിവേചിക്കുന്നതിൽ വളരെ പ്രധാനപ്പെട്ട ഒരു തത്വം നൽകുന്നു.
“ഈ ലോകത്തോട് അനുരൂപരാകാതെ നിങ്ങളുടെ മനസ്സു പുതുക്കി രൂപാന്തരപ്പെടുവിൻ; അങ്ങനെ ദൈവഹിതം ഇന്നതെന്ന്, നല്ലതും പ്രസാദകരവും പൂർണ്ണവുമായത് ഇന്നതെന്ന് നിങ്ങൾ തിരിച്ചറിയും.”
(റോമർ 12:1-2)
ദൈവഹിതം തിരിച്ചറിയുന്നത് പ്രവാചകന്റെ വാക്കുകൾ കേൾക്കുന്നതിലൂടെ മാത്രം അല്ല.
ആദ്യം നമ്മുടെ ജീവിതം ദൈവത്തിന് സമർപ്പിക്കുകയും, ഈ ലോകത്തിന്റെ ചിന്താരീതിക്ക് അനുരൂപരാകാതെ മനസ്സിന്റെ പുതുക്കത്തിലൂടെ രൂപാന്തരപ്പെടുകയും വേണം.
അതുകൊണ്ട് ഒരു പ്രവചനം കേൾക്കുമ്പോൾ:
“പ്രവാചകൻ എന്താണ് പറഞ്ഞത്?”
എന്ന ചോദ്യം മാത്രമല്ല,
“ഞാൻ ദൈവത്തിന് സമർപ്പിക്കപ്പെട്ടവനായി, പുതുക്കപ്പെട്ട മനസ്സോടെ ദൈവഹിതം തിരിച്ചറിയാൻ തയ്യാറാണോ?”
എന്നും ചോദിക്കണം.
നമുക്ക് ഇഷ്ടമുള്ള ഒരു കാര്യം ദൈവഹിതമാണെന്ന് തെളിയിക്കാൻ പ്രവചനത്തെ ഉപയോഗിക്കരുത്. പകരം, നമ്മുടെ ഇഷ്ടം ദൈവത്തിന് സമർപ്പിച്ച്, അവന്റെ നല്ലതും പ്രസാദകരവും പൂർണ്ണവുമായ ഹിതം എന്താണെന്ന് അന്വേഷിക്കണം.
ദൈവഹിതം തിരിച്ചറിയുക എന്നത് ദൈവഹിതത്തിന് കീഴടങ്ങുക എന്നതും കൂടിയാണ്.
14. ചിലപ്പോൾ ദൈവം തന്റെ പ്രവാചകന്മാരിലൂടെ നമ്മോട് സംസാരിക്കാം
ചില സാഹചര്യങ്ങളിൽ ദൈവം ഒരു പ്രവാചകന്റെ ശുശ്രൂഷ ഉപയോഗിച്ച് നമ്മെ ദൈവഹിതം മനസ്സിലാക്കാൻ സഹായിച്ചേക്കാം. നമുക്ക് ദൈവം എന്താണ് ചെയ്യുന്നതെന്ന് വ്യക്തമായി മനസ്സിലാകാത്ത സാഹചര്യത്തിൽ, ദൈവം ഒരു പ്രവചനത്തിലൂടെ ഒരു കാര്യം വെളിപ്പെടുത്തുകയോ ഓർമ്മിപ്പിക്കുകയോ ചെയ്യാം.
അതുപോലെ, ദൈവം മുമ്പ് നമ്മുടെ ഹൃദയത്തിൽ നൽകിയിരിക്കുന്ന ഒരു കാര്യത്തെ തന്റെ പ്രവാചകനിലൂടെ സ്ഥിരീകരിക്കാനും കഴിയും.
എന്നാൽ ഇതിന്റെ അർത്ഥം പ്രവാചകൻ നമ്മുടെ ജീവിതത്തിന്റെ സ്ഥാനത്ത് നിൽക്കുന്നു എന്നല്ല.
പ്രവചനം ദൈവവചനത്തെ മാറ്റിസ്ഥാപിക്കുന്നതല്ല. പ്രവാചകൻ നമ്മുടെ ദൈവമല്ല. നമ്മുടെ അന്തിമ ആശ്രയം ക്രിസ്തുവാണ്.
അതുകൊണ്ട് പ്രവചനം കേൾക്കുമ്പോൾ:
“ദൈവം ഇതിലൂടെ എന്നോട് എന്താണ് പറയുന്നത്?”
എന്ന് പ്രാർത്ഥനയോടെ അന്വേഷിക്കണം. അതോടൊപ്പം,
“ഇത് തിരുവചനത്തോടും ക്രിസ്തുവിനോടും യോജിക്കുന്നുണ്ടോ?”
എന്നും പരിശോധിക്കണം.
15. പ്രവചനത്തിലൂടെ ലഭിക്കുന്ന ദിശ ദൈവരാജ്യത്തിന്റെ ഉദ്ദേശ്യവുമായി ബന്ധപ്പെട്ടു കാണുന്നുണ്ടോ?
ഒരു പ്രവചനത്തിലൂടെ, ഉദാഹരണത്തിന്, “നീ മറ്റൊരു രാജ്യത്തേക്ക് പോകും” എന്നൊരു ദിശ ലഭിച്ചാൽ, അതിനെ വെറും ജോലി, പണം, ജീവിതസൗകര്യം എന്നിവയുടെ അടിസ്ഥാനത്തിൽ മാത്രം കാണരുത്.
ദൈവം നമ്മെ ഒരു സ്ഥലത്തേക്ക് അയയ്ക്കുന്നുവെങ്കിൽ, അതിന് അവന്റെ രാജ്യവുമായി ബന്ധപ്പെട്ട ഒരു പ്രത്യേക ഉദ്ദേശ്യം ഉണ്ടായിരിക്കാം.
അതുകൊണ്ട് ചോദിക്കേണ്ടത്:
“എനിക്ക് ഇതിലൂടെ എന്ത് ലഭിക്കും?”
എന്നത് മാത്രമല്ല.
“ക്രിസ്തുവിന് ഇതിലൂടെ എന്ത് ലഭിക്കും? ദൈവരാജ്യത്തിനായി ദൈവം എന്നെ എന്തിനാണ് ഇവിടെ അയയ്ക്കുന്നത്?”
എന്നും ചോദിക്കണം.
ദൈവം നമ്മെ അനുഗ്രഹിക്കുന്നത് നമ്മിൽ മാത്രം അവസാനിക്കാനല്ല; അവന്റെ ഉദ്ദേശ്യത്തിനായി നമ്മെ ഉപയോഗിക്കാനും കഴിയും.
അതുകൊണ്ട് പ്രവചനത്തെ വ്യക്തിപരമായ ആഗ്രഹങ്ങളും സാമ്പത്തിക നേട്ടങ്ങളും നിറവേറ്റാനുള്ള ഒരു ഉപകരണമാക്കരുത്.
16. എല്ലാം ക്രിസ്തുവിൽ വിവേചിക്കുക
17. അവസാനം ഏറ്റവും പ്രധാനപ്പെട്ട ചോദ്യം ഇതാണ്:
ഇത് എന്നെ ക്രിസ്തുവിനോട് കൂടുതൽ അടുപ്പിക്കുന്നുണ്ടോ?
പ്രവചനം, പ്രവാചകൻ, അത്ഭുതം, അടയാളം, അനുഭവം, വികാരം, വ്യക്തിപരമായ ആഗ്രഹം—എല്ലാം ക്രിസ്തുവിന്റെ വെളിച്ചത്തിൽ പരിശോധിക്കണം.
ക്രിസ്തുവിനെക്കാൾ പ്രവാചകനിൽ ആശ്രയിക്കാൻ തുടങ്ങുന്നിടത്ത് അപകടമുണ്ട്.
ദൈവവചനത്തെക്കാൾ ഒരു വ്യക്തിയുടെ വാക്കിന് അധികാരം നൽകുന്നിടത്ത് അപകടമുണ്ട്.
ദൈവരാജ്യത്തെക്കാൾ വ്യക്തിപരമായ നേട്ടം കേന്ദ്രമാകുന്നിടത്തും അപകടമുണ്ട്.
നമ്മുടെ വിവേചനത്തിന്റെ കേന്ദ്രം പ്രവാചകനല്ല.
ക്രിസ്തുവാണ്.
നമ്മുടെ ലക്ഷ്യം പ്രവചനത്തിന്റെ പിന്നാലെ പോകുകയല്ല.
പ്രവചനത്തിന്റെ കർത്താവായ ക്രിസ്തുവിന്റെ പിന്നാലെ പോകുക.
“പ്രവചനങ്ങളെ നിരസിക്കരുത്. എല്ലാം ശോധനചെയ്തു നല്ലതു മുറുകെപ്പിടിപ്പിൻ.”
